ഇസ്രയേലിന് നേരെ വീണ്ടും ഹമാസിന്റെ മിന്നലാക്രമണം. ടെല് അവീവ് ലക്ഷ്യമിട്ട് തെക്കന് ഗാസ നഗരമായ റഫയില് നിന്നാണ് ഹമാസ് മിസൈലുകള് തൊടുത്തത്. എട്ടോളം മിസൈലുകളാണ് ഹമാസ് തുടരെ തൊടുത്തതെന്നാണ് റിപ്പോര്ട്ട്. റോക്കറ്റ് ആക്രമണത്തില് ആളപായമോ നാശനഷ്ടങ്ങളോ റിപ്പോര്ട്ട് ചെയ്തിട്ടില്ല. ഇസ്രയേലിന് നേരെ ആക്രമണം നടത്തിയതായി ഹമാസിന്റെ സൈനിക വിഭാഗം അറിയിച്ചു. ടെല് അവീവില് വലിയ മിസൈല് ആക്രണം നടത്തിയെന്ന വിവരം ഹമാസിന്റെ സൈനിക സേനയായ ഇസദീന് അല് ഖസാം ബ്രിഗേഡ്സ് തങ്ങളുടെ ടെലഗ്രാം ചാനലില് അറിയിച്ചു.
സാധാരണക്കാരായ ജനങ്ങള്ക്ക് നേരെയുള്ള സയണിസ്റ്റ് കൂട്ടക്കൊലക്ക് മറുപടിയായിട്ടാണ് റോക്കറ്റുകള് വിക്ഷേപിച്ചതെന്ന് അല് ഖസാം ബ്രിഗേഡ്സ് പറഞ്ഞു. ഇസ്രയേലിന് നേരെ വീണ്ടും ഹമാസിന്റെ മിന്നലാക്രമണം; നിരവധി മിസൈലുകള് തടഞ്ഞതായി സൈന്യം തെക്കന് ഗാസ നഗരമായ റഫയുടെ പ്രദേശത്ത് നിന്ന് എട്ട് മിസൈലുകള് ഇസ്രായേല് അതിര്ത്തി കടന്നതായി ഇസ്രായേല് സൈന്യം പറഞ്ഞു. നിരവധി മിസൈലുകള് തടഞ്ഞുവെന്നും സൈന്യം അറിയിച്ചു. ഇസ്രയേല് സൈനിക വിഭാഗം നടപടികള് സ്വീകരിക്കാന് ആരംഭിച്ചതായാണ് അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്യുന്നത്.
