സുപ്രീം കോടതി ചീഫ് ജസ്റ്റിസ് അധ്യക്ഷനായ അഞ്ചംഗ ഭരണഘടനാ ബഞ്ചിന്റെതാണ് ഉത്തരവ്.1988-ലെ മോട്ടോര് വാഹന നിയമത്തിലെ വ്യവസ്ഥകള് കോടതി അംഗീകരിച്ചു .
ലൈറ്റ് വെഹിക്കിള് ലൈസന്സില് ട്രാന്സ്പോര്ട്ട് വാഹനങ്ങള് ഓടിക്കുന്നതുമായി ബന്ധപ്പെട്ട് കേന്ദ്രസര്ക്കാരിന്റെ വിശദീകരണം തേടിയ ശേഷമാണ് കോടതി ഉത്തരവ്.
7500 കിലോഗ്രാമില് കൂടുതല് ഭാരമുള്ള ട്രാന്സ്പോര്ട്ട് വാഹനങ്ങള്ക്ക് മാത്രമേ അധിക യോഗ്യതാ ആവശ്യമുള്ളൂവെന്ന് കോടതി വ്യക്തമാക്കി.
ലൈറ്റ് മോട്ടോര് വെഹിക്കിളിന്റെ (എല്എംവി) ഡ്രൈവിങ് ലൈസന്സ് കൈവശമുള്ള ഒരാള്ക്ക് ലൈറ്റ് മോട്ടോര് വെഹിക്കിളിന്റെ ട്രാന്സ്പോര്ട്ട് വെഹിക്കിള് ഓടിക്കാന് അര്ഹതയുണ്ടോ എന്ന വിഷയം അഞ്ചംഗ ഭരണഘടനാ ബെഞ്ച് പരിഗണിക്കുകയായിരുന്നു.
ചീഫ് ജസ്റ്റിസ് ഡി വൈ ചന്ദ്രചൂഡിന്റെ നേതൃത്വത്തിലുള്ള ജസ്റ്റിസ് ഹൃഷികേശ് റോയ്, ജസ്റ്റിസ് പി എസ് നരസിംഹ, ജസ്റ്റിസ് പങ്കജ് മിത്തല്, ജസ്റ്റിസ് മനോജ് മിശ്ര എന്നിവരടങ്ങിയ ബെഞ്ചാണ് വിധി പ്രസ്താവിച്ചത്.
1988-ലെ മോട്ടോര് വെഹിക്കിള്സ് ആക്ടിലെ (എംവിഎ) പ്രസക്തമായ ഭേദഗതികളുമായി ബന്ധപ്പെട്ട നയപരമായ മാറ്റങ്ങളെക്കുറിച്ചുള്ള ചര്ച്ചകള് ഈ വിഷയത്തില് സംസ്ഥാന സര്ക്കാരുകളുമായി ഏതാണ്ട് പൂര്ത്തിയായതായി അറ്റോര്ണി ജനറല് ഫോര് ഇന്ത്യ ആര് വെങ്കിട്ടരമണി ബെഞ്ചിനെ അറിയിച്ചിരുന്നു.
Leave a Reply