വ്യോമയാന ഇന്ധന വിലയിലുണ്ടായ തുടര്‍ച്ചയായ വര്‍ധനയും പ്രവര്‍ത്തനച്ചെലവിലുണ്ടായ ഉയര്‍ച്ചയും കണക്കിലെടുത്ത് എയര്‍ ഇന്ത്യയും എയര്‍ ഇന്ത്യ എക്‌സ്പ്രസും ആഭ്യന്തര, അന്താരാഷ്ട്ര സര്‍വീസുകളിലെ ഇന്ധന സര്‍ചാര്‍ജ് വര്‍ധിപ്പിച്ചു. വിമാന ഇന്ധനച്ചെലവ് വര്‍ധിച്ചതിനെത്തുടര്‍ന്ന് ഇന്‍ഡിഗോയും സര്‍ചാര്‍ജ് പരിഷ്‌കരിച്ചതിന് പിന്നാലെയാണ് എയര്‍ ഇന്ത്യയുടെയും ഈ നീക്കം.
ആഭ്യന്തര സര്‍വീസുകള്‍ക്ക് 1,001 മുതല്‍ 1,500 കിലോമീറ്റര്‍ വരെയുള്ള യാത്രകള്‍ക്ക് 850 രൂപയും, 1,500 കിലോമീറ്ററിന് മുകളിലുള്ള യാത്രകള്‍ക്ക് 1,200 രൂപയുമാണ് പുതിയ ഇന്ധന സര്‍ചാര്‍ജ്. അന്താരാഷ്ട്ര സര്‍വീസുകളിലും സര്‍ചാര്‍ജ് കൂട്ടി. വടക്കേ അമേരിക്കയിലേക്ക് സര്‍ചാര്‍ജ് 215 യുഎസ് ഡോളറായി ഉയര്‍ത്തി. ഓസ്‌ട്രേലിയയിലേക്ക് 210 യുഎസ് ഡോളര്‍, യുകെ ഉള്‍പ്പെടെയുള്ള യൂറോപ്യന്‍ രാജ്യങ്ങളിലേക്ക് 135 യുഎസ് ഡോളര്‍ എന്നിങ്ങനെയാണ് പുതുക്കിയ നിരക്ക്.
ആഗോള ഊര്‍ജ വിപണിയിലെ അസ്ഥിരതയും വിലവര്‍ധനയുമാണ് ഇന്ത്യയിലെ വിമാനക്കമ്പനികളുടെ പ്രവര്‍ത്തനച്ചെലവ് കൂടാന്‍ കാരണമായത്. വിമാനക്കമ്പനികളുടെ ആകെ പ്രവര്‍ത്തനച്ചെലവിന്റെ ഏകദേശം 40 ശതമാനത്തോളം വരുന്നത് ഇന്ധനത്തിനാണ്. വര്‍ധിച്ചുവരുന്ന ഇന്ധനച്ചെലവ് ഭാഗികമായി നികത്താനും സര്‍വീസുകള്‍ തടസ്സമില്ലാതെ തുടരാനുമാണ് സര്‍ചാര്‍ജ് പരിഷ്‌കരിച്ചതെന്ന് എയര്‍ ഇന്ത്യയും എയര്‍ ഇന്ത്യ എക്‌സ്പ്രസും സംയുക്ത പ്രസ്താവനയിലൂടെ വ്യക്തമാക്കി. പുതിയ നിരക്കുകള്‍ ഇന്നുമുതല്‍ നിലവില്‍വരും.
Leave a Reply