തമിഴ്നാട് വാല്പ്പാറയിലുണ്ടായ വാഹനാപകടത്തില് പരിക്കേറ്റ് ചികിത്സയിലായിരുന്ന നൗഷാദ് അലി മരിച്ചു. കോയമ്പത്തൂരിലെ സര്ക്കാര് ആശുപത്രിയില് ചികിത്സയില് കഴിയവേ ഇന്ന് പുലര്ച്ചെയാണ് മരണം സംഭവിച്ചത്. ഇതോടെ അപകടത്തില് മരിച്ചവരുടെ എണ്ണം പത്തായി. കോയമ്പത്തൂരില് തീവ്ര പരിചരണ വിഭാഗത്തില് ആയിരുന്നു നൗഷാദ് അലി ചികിത്സയില് കഴിഞ്ഞത്. നൗഷാദ് അലിയുടെ ആരോഗ്യനില വഷളായിട്ടും ഡോക്ടര്മാര് എത്താന് വൈകിയതാണ് മരണം സംഭവിക്കാന് കാരണമെന്ന് കുടുംബം ആരോപിച്ചു. തീവ്രപരിചരണ വിഭാഗത്തില് ചികിത്സയിലിരിക്കെയാണ് മരണം. അപകടത്തില് പരിക്കേറ്റ ഷഹദിന്, മുഹമ്മദ് ഫായിസ് എന്നിവര് ചികിത്സയില് തുടരുകയാണ്.
കോയമ്പത്തൂര് മെഡിക്കല് കോളജിലുള്ള മുഹമ്മദ് ഫായിസിന്റെ ആരോഗ്യനില ഇപ്പോഴും അതീവ ഗുരുതരമായി തുടരുന്നു. ഇദ്ദേഹം തീവ്രപരിചരണ വിഭാഗത്തില് നിരീക്ഷണത്തിലാണ്. അതേസമയം, കോയമ്പത്തൂരില് തന്നെയുള്ള സഹദിന് മുഹമ്മദിന്റെ നിലയില് നേരിയ പുരോഗതിയുള്ളതിനാല് വാര്ഡിലേക്ക് മാറ്റിയിട്ടുണ്ട്. പെരിന്തല്മണ്ണയിലെ സ്വകാര്യ ആശുപത്രിയില് ചികിത്സയിലുള്ള മസ്നിന്റെ ആരോഗ്യനില തൃപ്തികരമാണെന്ന് ഡോക്ടര്മാര് അറിയിച്ചു. ഇദ്ദേഹത്തെയും വാര്ഡിലേക്ക് മാറ്റിയിട്ടുണ്ട്. കഴിഞ്ഞ വെള്ളിയാഴ്ചയാണ് വാല്പ്പാറയില് അപകടമുണ്ടായത്. മലപ്പുറം പാങ്ങ് പള്ളിപ്പറമ്പ് സര്ക്കാര് എല് പി സ്കൂളില് നിന്നുള്ള അധ്യാപകരും ജീവനക്കാരും സഞ്ചരിച്ച വാന് അപകടത്തില്പ്പെടുകയായിരുന്നു. അപകടത്തില് അന്ന് തന്നെ ഒമ്പത് പേര് മരിക്കുകയായിരുന്നു.
പാങ്ങ് ജിഎല്പി സ്കൂളിലെ പ്രധാനാധ്യാപിക അജിത (54), അധ്യാപകാരായ റംല (52), സുഹറ(43), ആശ(41), മജീദ് (43), മജീദിന്റ ഭാര്യ റുഖിയ (39), സ്കൂളിലെ പാചകത്തൊഴിലാളി സാജിത (45), പാങ്ങ് ജിഎല്പി സ്കൂളില് നിന്നും സമീപത്തെ പാങ്ങി ജിയുപി സ്കൂളിലേക്ക് അടുത്തിടെ മാറിയ അധ്യാപിക ഷക്കീന (47) എന്നിവരാണ് സംഭവസ്ഥലത്ത് മരിച്ചത്. സുഹറയുടെ മകന് ഹിഷാം (12) പൊള്ളാച്ചി ആശുപത്രിയില് എത്തിയ ശേഷവും മരിച്ചു. ഡ്രൈവര് ഉള്പ്പെടെ 13 പേരായിരുന്നു വാഹനത്തില് ഉണ്ടായിരുന്നത്.
