ബംഗളൂരുവില് കനത്തമഴയില് മതില് ഇടിഞ്ഞ് വീണ് രണ്ട് മലയാളികള് ഉള്പ്പെടെ ഏഴുപേര്ക്ക് ദാരുണാന്ത്യം. കേരളത്തില് നിന്ന് വിനോദയാത്രയ്ക്ക് പോയ കുടുംബശ്രീ സംഘത്തിലെ രണ്ടു അംഗങ്ങള്ക്കാണ് ജീവന് നഷ്ടമായത്. എറണാകുളം രാമമംഗലം സ്വദേശികളായ ലത, സ്മിത എന്നിവരാണ് മരിച്ചത്. കേരളത്തില് നിന്നെത്തിയ 56 അംഗ സംഘത്തിലെ മൂന്ന് സ്ത്രീകള്ക്ക് പരിക്കേറ്റിട്ടുണ്ട്. മഴ കനത്തതോടെ നഗരത്തിന്റെ വിവിധ ഭാഗങ്ങളില് വലിയ ഗതാഗക്കുരുക്ക് ആണ് അനുഭവപ്പെടുന്നത്.
ഇന്ന് വൈകീട്ട് അഞ്ചുമണിക്ക് ശിവാജി നഗറിലാണ് സംഭവം. ഇന്ന് രാവിലെയാണ് കുടുംബശ്രീ സംഘം ഇവിടെയെത്തിയത്. പര്ച്ചേയ്സിനാണ് കുടുംബശ്രീ സംഘത്തിലെ അഞ്ചുപേര് ശിവാജി നഗറില് എത്തിയത്. മതിലിന് താഴെ ഒരു ടാര്പോളിന് ഷീറ്റ് കെട്ടിയിരുന്നു. ഇതിന് താഴെ നിന്നിരുന്ന അഞ്ചുമലയാളികളാണ് അപകടത്തില്പ്പെട്ടത്. ഉടന് തന്നെ ആശുപത്രിയില് എത്തിച്ചെങ്കിലും രണ്ടുപേരുടെ ജീവന് രക്ഷിക്കാന് സാധിച്ചില്ല. പരിക്കേറ്റ മൂന്ന് സ്ത്രീകള് തൊട്ടടുത്തുള്ള ആശുപത്രിയില് ചികിത്സയിലാണ്.
അമൃതംപൊടി ഉണ്ടാക്കുന്ന യൂണിറ്റിലെ അംഗങ്ങളാണ് അപകടത്തില്പ്പെട്ടത്. ബംഗളൂരുവില് എത്തിയ 56 സംഘം വിവിധ ഗ്രൂപ്പുകളായി തിരിഞ്ഞാണ് വിവിധയിടങ്ങളിലേക്ക് പോയത്. കനത്തമഴയില് എട്ടടി ഉയരമുള്ള മതിലാണ് ഇടിഞ്ഞുവീണത്. കര്ണാടക മുഖ്യമന്ത്രി സിദ്ധരാമയ്യ അടക്കമുള്ളവര് സംഭവ സ്ഥലം സന്ദര്ശിച്ചു.
Bengaluru tragedy, wall collapses during heavy rain; seven people including two Malayalis die
Bengaluru,kudumbashree,bengaluru accident,Wall collapses,Bengaluru tragedy,
