സ്വവര്ഗ വിവാഹത്തിലെ പുനഃപരിശോധനാ ഹര്ജി പരിഗണിക്കാന് നിയോഗിച്ച സുപ്രീംകോടതി അഞ്ചംഗ ബെഞ്ചില് നിന്നും ജസ്റ്റിസ് സ്ഞ്ജീവ് ഖന്ന പിന്മാറി. ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ അഞ്ചംഗ ബെഞ്ച് ഇന്ന് ഉച്ചക്ക് 1.30ന് ചേംബറില് പുനഃപരിശോധനാ ഹര്ജി പരിഗണിക്കുന്ന സമയത്താണ് ജസ്റ്റിസ് സഞ്ജീവ് ഖന്ന പിന്മാറുന്ന വിവരം അറിയിച്ചത്.
ചൊവ്വാഴ്ചയാണ് തുറന്ന കോടതിയില് ഹര്ജികള് പരിഗണിക്കണമെന്നാവശ്യപ്പെട്ട് ചീഫ് ജസ്റ്റിസ് ഡി വൈ ചന്ദ്രചൂഡിന്റെ നേതൃത്വത്തിലുള്ള ബെഞ്ചിന് മുമ്പാകെ മുതിര്ന്ന അഭിഭാഷകന് നീരജ് കിഷന് കൗള് ആവശ്യപ്പെട്ടത്. എന്നാല് സുപ്രീംകോടതി വിധി പുനഃപരിശോധിക്കണമെങ്കില് ചേംബറില് തന്നെ പരിഗണിക്കണമെന്ന് കോടതി വ്യക്തമാക്കുകയായിരുന്നു.
2023 ഒക്ടോബര് 17നാണ് സ്വവര്ഗ വിവാഹത്തിലെ നിയമസാധുത തേടിയുള്ള ഹര്ജികളില് സുപ്രീംകോടതി വിധി പറഞ്ഞത്. ചീഫ് ജസ്റ്റിസ് ഡി വൈ ചന്ദ്രചൂഡിന്റെ നേതൃത്വത്തിലുള്ള അഞ്ചംഗ ബെഞ്ചില് ജസ്റ്റിസുമാരായ സഞ്ജയ് കിഷന് കൗള്, എസ് രവീന്ദ്ര ഭട്ട്, ഹിമ കോലി, പി എസ് നരസിംഹ എന്നിവരാണ് വിധി പുറപ്പെടുവിച്ചത്.