മലപ്പുറം നിപ മുക്തമായതായി ആരോഗ്യമന്ത്രി വീണ ജോര്ജ്. ആദ്യ കേസ് റിപ്പോര്ട്ട് ചെയ്ത് ശേഷമുള്ള ഡബിള് ഇന്ക്യുബേഷന് പിരീഡ് ആയ 42 ദിവസം പൂര്ത്തിയാക്കി, സമ്പര്ക്കപ്പട്ടികയിലുള്ള എല്ലാവരുടേയും സാമ്പിളുകള് പരിശോധിച്ച് നെഗറ്റീവ് ആണെന്ന് ഉറപ്പാക്കിയിട്ടുണ്ടെന്നും മന്ത്രി അറിയിച്ചു.നിപ സമ്പര്ക്കപ്പട്ടികയില് ഉള്പ്പെട്ട 472 പേരേയും പട്ടികയില് നിന്നും ഒഴിവാക്കി. പ്രത്യേക കണ്ട്രോള് റൂം പ്രവര്ത്തനം അവസാനിപ്പിച്ചു. മരണമടഞ്ഞ കുട്ടിയ്ക്ക് മാത്രമാണ് നിപ സ്ഥിരീകരിച്ചത്. എന്നാല് ശക്തമായ പ്രതിരോധ പ്രവര്ത്തനങ്ങള് നടത്തിയത് കാരണം മറ്റൊരാളിലേക്ക് രോഗം പകരാതെ തടയാനായി.
നിപ നിയന്ത്രണത്തിനായി നിപ മാര്ഗനിര്ദേശങ്ങള്ക്കനുസൃതമായി 25 കമ്മിറ്റികള് മണിക്കൂറുകള്ക്കുള്ളില് രൂപീകരിച്ചു. കോണ്ടാക്ട് ട്രേയ്സിങ് അന്ന് രാവിലെ മുതല് ആരംഭിച്ചു. 24 മണിക്കൂറും പ്രവര്ത്തിക്കുന്ന നിപ കണ്ട്രോള് റൂം ആരംഭിച്ചു. നിപ സമ്പര്ക്ക പട്ടിക തയ്യാറാക്കുകയും റൂട്ട് മാപ്പ് പ്രസിദ്ധീകരിക്കുകയും ചെയ്തു. മാര്ഗനിര്ദേശങ്ങള്ക്ക് അനുസൃതമായി രോഗ സാധ്യതയുള്ള എല്ലാവരുടെയും സാമ്പിളുകള് പരിശോധിച്ചു. മഞ്ചേരി മെഡിക്കല് കോളജിലും കോഴിക്കോട് മെഡിക്കല് കോളജിലും ആവശ്യമായ തീവ്ര പരിചരണ സംവിധാനങ്ങളും ക്രമീകരിച്ചു.
