പി എം ശ്രീ പദ്ധതി മരവിപ്പിക്കാനുള്ള മന്ത്രിസഭാ തീരുമാനത്തിന് പിന്നാലെ, എസ്എസ്കെ ഫണ്ട് ലഭിക്കുന്നതിനായി വിദ്യാഭ്യാസമന്ത്രി വി ശിവന്കുട്ടി ഡല്ഹിയിലേക്ക്. ഈ മാസം പത്തിന് കേന്ദ്ര വിദ്യഭ്യാസമന്ത്രിയുമായി കൂടിക്കാഴ്ച നടത്താനാണ് ശ്രമം. പദ്ധതി മരവിപ്പിക്കാനുള്ള മന്ത്രിസഭാ യോഗ തീരുമാനം കേന്ദ്രത്തെ കത്ത് വഴി അറിയിക്കുന്നത് മുഖ്യമന്ത്രിയുമായി കൂടിയാലോചിച്ച ശേഷം ആയിരിക്കുമെന്ന് മന്ത്രി പറഞ്ഞു. കത്തിന്റെ കരട് തയ്യാറാക്കിയെങ്കിലും മുഖ്യമന്ത്രി ഫയല് കണ്ടില്ലെന്നാണ് സൂചന.
പിഎം ശ്രീ പദ്ധതിയില് നിന്ന് കേരളം പിന്മാറരുതെന്ന് കേന്ദ്രസര്ക്കാര് ആവശ്യപ്പെട്ടിരുന്നു. കരാറില് ഉറച്ചുനില്ക്കണമെന്ന് കേന്ദ്ര വിദ്യാഭ്യാസമന്ത്രി ധര്മേന്ദ്രപ്രധാന് പ്രതികരിച്ചിരുന്നുച്ചു. പിഎം ശ്രീ പദ്ധതിയില് ചേര്ന്ന ഉടന് എസ്എസ്കെ ഫണ്ട് 320 കോടി രൂപ സംസ്ഥാനത്തിന് ലഭിക്കുമെന്നായിരുന്നു പ്രതീക്ഷിച്ചിരുന്നത്. ബുധനാഴ്ച പണം അനുവദിമെന്നായിരുന്നു അറിയിപ്പ്. പദ്ധതി മരവിപ്പിക്കാന് തീരുമാനിച്ചതോടെ ഫണ്ട് അനുവദിക്കുന്നതില് നിന്ന് കേന്ദ്രം പിന്നോട്ട് പോയി എന്നാണ് വിവരം.
അതേസമയം സിപിഐഎം സംസ്ഥാന നേതൃയോഗങ്ങള് ഇന്ന് ചേരും. ഇടതുമുന്നണിയില് തര്ക്കത്തിന് ഇടയാക്കിയ പി.എം. ശ്രീ പദ്ധതി സംബന്ധിച്ച ഒത്തുതീര്പ്പിന് ശേഷം ഇതാദ്യമായാണ് സിപിഐഎമ്മിന്റെ സംസ്ഥാന സെക്രട്ടറിയേറ്റും സമിതിയും ചേരുന്നത്. ചര്ച്ച കൂടാതെ ധാരണ പത്രത്തില് ഒപ്പിട്ട നടപടിക്കെതിരെ എന്ത് നിലപാട് സ്വീകരിക്കും എന്നതാണ് സിപിഐഎം നേതൃയോഗങ്ങളെ ശ്രദ്ധേയമാക്കുന്നത്.
