ശ്രീകരുണാകരഗുരുവിന്റെ ഉപദേശങ്ങൾ മനസ്സിനെ നിയന്ത്രിക്കാൻ പര്യാപ്തമായത് – കേന്ദ്രമന്ത്രി ജോർജ് കുര്യൻ
പോത്തൻകോട് : ശാന്തിഗിരി ആശ്രമം തികച്ചും മാതൃകാപരമായ സ്ഥാപനമാണ്. ആധുനിക കാലഘട്ടത്തിൽ മനുഷ്യമനസ്സിനെ നിയന്ത്രിക്കാൻ പര്യാപ്തമായ ഉപദേശങ്ങളാണ് ശ്രീകരുണാകരഗുരു ലോകത്തിന് നൽകിയത്. അതുകൊണ്ടാണ് ആയിരകണക്കിന് കുടുംബങ്ങൾ ഇവിടെ വന്നു താമസിക്കുന്നതും ആശ്രമ കർമ്മങ്ങളിൽ പങ്കാളിയാകുന്നതും . ആദ്ധ്യാത്മിക ചൈതന്യത്തിനും അതോടൊപ്പം തന്നെ ഭൗതികമായ ഉയർച്ചയ്ക്കും ആശ്രമം നൽകുന്ന മാനസിക പിന്തുണ കൂടുതൽ ജനങ്ങളിലേക്കെത്തണമെന്നും കേന്ദ്ര ന്യൂനപക്ഷകാര്യ സഹമന്ത്രി ജോര്ജ് കുര്യന് . ശാന്തിഗിരി ആശ്രമത്തില് തൊണ്ണൂറ്റിയെട്ടാമത് ‘നവപൂജിതം’ ആഘോഷത്തോടനുബന്ധിച്ച് നടന്ന പൊതുസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു മന്ത്രി.
1999-2000 കാലഘട്ടത്തിൽ ശാന്തിഗിരി ആശ്രമത്തിന്റെ ന്യൂഡൽഹി സാകേത് ബ്രാഞ്ചാശ്രമത്തിന്റെ ചുമതല വഹിച്ചിരുന്ന പില്ക്കാലത്ത് ഗുരുജ്യോതിയിൽ ലയിച്ച സ്വാമി ജ്യോതിർമയ ജ്ഞാന തപസ്വിയിൽ നിന്നാണ് ആശ്രമത്തിന്റെ വിപുലമായ സേവനപ്രവർത്തനങ്ങളെക്കുറിച്ചും ആദ്ധ്യാത്മിക പദ്ധതികളെക്കുറിച്ചും ഔഷധങ്ങളെക്കുറിച്ചും മനസ്സിലാക്കാൻ കഴിഞ്ഞതെന്നും മന്ത്രി കൂട്ടിച്ചേര്ത്തു. നവപൂജിതം സുവനീർ പ്രകാശനം മന്ത്രി ജോർജ് കുര്യൻ അഡ്വ.എ.എ.റഹീം എം.പി യ്ക്ക് നൽകി നിർവഹിച്ചു.
മുന് കേന്ദ്ര വിദേശകാര്യ സഹമന്ത്രി വി.മുരളീധരന് ചടങ്ങിൽ മുഖ്യപ്രഭാഷണം നടത്തി. ആദ്ധ്യാത്മികതയും ഭൗതികതയും ഇഴചേർന്ന ഭാരതീയ സംസ്കാരത്തിൻ്റെ ഉടമകളാണ് നമ്മളെന്നും വർത്തമാന കാലഘട്ടത്തിൽ ശ്രീകരുണാകരഗുരുവിന്റെ സന്ദേശങ്ങൾക്ക് ഏറെ പ്രസക്തിയുണ്ടെന്നും അദ്ധേഹം പറഞ്ഞു.
കടകംപള്ളി സുരേന്ദ്രന് എം.എല്.എ അദ്ധ്യക്ഷത വഹിച്ച ചടങ്ങിൽ ആശ്രമം പ്രസിഡന്റ് സ്വാമി ചൈതന്യ ജ്ഞാന തപസ്വി, ജനറല് സെക്രട്ടറി സ്വാമി ഗുരുരത്നം ജ്ഞാന തപസ്വി, പാളയം ഇമാം ഡോ.വി.പി. ഷുഹൈബ് മൗലവി, ചെമ്പഴന്തി ഗുരുകുലം മഠാധിപതി സ്വാമി അഭയാനന്ദ എന്നിവര് മഹനീയ സാന്നിദ്ധ്യമായി.
മികച്ച സഹകാരിയ്ക്കുള്ള റോബര്ട്ട് ഓവന് അവാര്ഡ് നേടിയ സംസ്ഥാന സഹകരണ യൂണിയന് പ്രസിഡന്റ് കോലിയക്കോട് എന്.കൃഷ്ണന് നായർക്കുളള ആദരവ് മകൻ ടി.രാധാകൃഷ്ണൻ ഏറ്റുവാങ്ങി. അനില്ചേര്ത്തല രചിച്ച ‘അവധൂത യാത്ര’, ശ്രീമംഗലം കളരി രാജീവ് ഗുരുക്കള് രചിച്ച’ വന്ദനം’ , വാസുദേവൻ വൈദ്യർ രചിച്ച ഭക്തി സ്മരണാഞ്ജലി എന്നീ പുസ്തകങ്ങളുടെ പ്രകാശനകര്മ്മവും ചടങ്ങിൽ നടന്നു.
അടൂര് പ്രകാശ് എം.പി, എം.എല്.എ മാരായ അഡ്വ.വി.ജോയി , അഡ്വ.എം.വിന്സെന്റ്, തിരുവിതാംകൂര് ദേവസ്വം ബോര്ഡ് പ്രസിഡന്റ് അഡ്വ. പി.എസ്.പ്രശാന്ത്, മുന് എം.എല്.എ. എം.എ വാഹിദ്, ഐ.എന്.റ്റി.യു.സി. ദേശീയ വൈസ് പ്രസിഡന്റ് ആര്. ചന്ദ്രശേഖരന്, പത്തനാപുരം ഗാന്ധിഭവന് ചെയര്മാന് ഡോ.പുനലൂര് സോമരാജന്, ബിജെപി സംസ്ഥാന വൈസ് പ്രസിഡന്റ് സി.ശിവന്കുട്ടി, പോത്തന്കോട് ഗ്രാമപഞ്ചായത്ത് പ്രസിഡന്റ് റ്റി.ആര്. അനില്കുമാര്, കേരള പി.എസ്.സി അംഗം എസ്.വിജയകുമാരന് നായര്, തിരുവിതാംകൂര് ദേവസ്വം ബോര്ഡ് അംഗം അഡ്വ.എ. അജികുമാര്, നിംസ് മെഡിസിറ്റി മാനേജിംഗ് ഡയറക്ടര് എം.എസ്. ഫൈസല് ഖാന്, സരസ്വതി വിദ്യാലയം ചെയര്മാന് ഡോ.ജി.രാജ് മോഹന്, ബ്രഹ്മകുമാരി ശരണ്യ, ഹിന്ദു ഐക്യവേദി സംസ്ഥാന സെക്രട്ടറി കെ.പ്രഭാകരന്, സാമൂഹ്യ പ്രവർത്തക ഡോ.മറിയ ഉമ്മന്, തിരുവനന്തപുരം ഡി.സി.സി വൈസ് പ്രസിഡന്റ് അഡ്വ. എം. മുനീര്, ഭാരതീയ ജനതാപാർട്ടി ജില്ലാ ട്രഷറർ എം.ബാലമുരളി, പത്തനാപുരം ഗാന്ധിഭവൻ സി.ഇ.ഒ ഡോ.വിന്സെന്റ് ഡാനിയേൽ, ശാന്തിഗിരി ആത്മവിദ്യാലയം അഡ്വൈസർ സബീര് തിരുമല, പോത്തൻകോട് ഗ്രാമപഞ്ചായത്ത് വൈസ് പ്രസിഡൻ്റ് പി.അനിതകുമാരി, ജില്ലാപഞ്ചായത്തംഗം കെ.ഷീലാകുമാരി, മാണിക്കല് ഗ്രാമപഞ്ചായത്ത് ക്ഷേമകാര്യ സ്റ്റാന്റിംഗ് കമ്മിറ്റി ചെയര് പേഴ്സണ് ആര്. സഹീറത്ത് ബീവി, ശാന്തിഗിരി വിശ്വസാംസ്കാരിക നവോത്ഥാന കേന്ദ്രം ഗവേണിംഗ് കമ്മിറ്റി അംഗം ഡോ. മുരളീധരൻ.എം, മാതൃമണ്ഡലം കണ്വീനര് ഷീല.എസ്, ഗുരുമഹിമ ഗവേണിംഗ് കമ്മിറ്റി കോര്ഡിനേറ്റര് കുമാരി അജ്ഞന സുനിൽ എന്നിവർ ചടങ്ങിൽ പങ്കെടുത്തു. ആശ്രമം ജോയിൻ്റ് സെക്രട്ടറി സ്വാമി നവനന്മ ജ്ഞാന തപസ്വി സ്വാഗതവും ശാന്തിമഹിമ കോര്ഡിനേറ്റര് ബ്രഹ്മചാരി അരവിന്ദ് കൃതജ്ഞതയും പറഞ്ഞു.
രാവിലെ 5 മണിക്ക് സന്ന്യാസ സംഘത്തിന്റെ പ്രത്യേക പുഷ്പാഞ്ജലിയോടെയാണ് പ്രാര്ത്ഥനചടങ്ങുകള് ആരംഭിച്ചത്. 6 മണിക്ക് ആശ്രമം പ്രസിഡന്റ് സ്വാമി ചൈതന്യ ജ്ഞാന തപസ്വി ധ്വജാരോഹണം നിർവഹിച്ചു. 7 മണി മുതല് ഗുരുഭക്തർ താമരപർണ്ണശാലയിൽ പുഷ്പസമര്പ്പണം നടത്തി. ഉച്ചയ്ക്ക് 12 മണിക്ക് ഗുരുദര്ശനവും വിവിധ സമര്പ്പണങ്ങളും അന്നദാനവും നടന്നു.
